KLIMA-ALDAKETARI BURUZKO IKASGELAKlimaBai! Programa
KlimaBai! Programa Gipuzkoako Foru Aldundiko Ingurumeneko Departamentuak diseinatu du, eta lurraldeko udalei eta herritarrei zuzenduta dago. Zazpi ekintza-eremu proposatzen ditu: energia, elikadura, ehunak, ur-kontsumoa, hondakinak, mugikortasun jasangarria eta biodibertsitatea. Eremu horietako bakoitzean, programak baliabide eta material praktikoak ditu gaia ezagutu eta sakontzeko, eta tresna horiek interesa duten pertsonei lagunduko diete ingurumenean eta haren ekosistemetan inpaktu txikiagoa eragiten duten ohiturak eta ekintzak hartzeko gaitasunak, trebetasunak, ezagutzak eta balioak garatzen, norberak zer egin dezakeen jakiteak aldea markatzen baitu.
Baliabide horiek biltegi gisa erabil daitezke, eta, programaren edizio berriak egin ahala, dokumentazio berria gehituz joango da. Arlo hauetan aurkituko duzu informazioa: energia, elikadura, ehungintza, ur-kontsumoa, hondakinak, mugikortasun jasangarria eta biodibertsitatea.
Energia
Energia-eraginkortasuna hobetzea eta energia-iturri garbiagoak erabiltzea dira berotegi-efektua eragiten duten gasen emisioak murrizteko eta klima-aldaketa arintzen laguntzeko modurik errentagarrienak.
Elikadura
Gure elikatze-ohiturak dieta iraunkorragoaren truke aldatzea, hurbileko, tokiko eta denboraldiko janariak kontsumitzea eta elikagaien hondakinak gutxitzea lagungarria da gure elikadura ingurumenekiko duen inpaktua murrizteko.
Ehungintza
Erabiltzen dugun arropak ere badu inpaktua ingurumenean. Gero eta faktore garrantzitsuagoak dira sektore honetan diseinu- eta jantzigintza-praktika berriak, lehengai iraunkorragoen erabilera; birziklatzea eta hondakinen kudeaketa eta ingurumena gehiago errespetatzen duen moda-kontsumoa.
Ura
Klima-aldaketak eragin negatiboa izan dezake uraren kantitatean eta kalitatean; ura gure bizitzako eremu guztietan dago. Kontsumo arduratsu bati esker, CO2 emisioak murriztea eta funtsezkoa den baliabide hau modu eraginkor batean erabili ahal izango da.
Hondakinen hierarkia
Hondakinak murrizteko modurik eraginkorrena, lehenik eta behin, ez sortzea da. Beharrezkoa da baliabide naturalak kontserbatzea eta berotegi-efektuko gasen emisioak murriztea, murriztuz, berrerabiliz eta, azkenik, birziklatuz.
Mugikortasun jasangarria
Mugikortasuna da deskarbonizaziorako bidean gehien eragiten duen faktoreetako bat. Horregatik, ezinbestekoa da mugikortasun iraunkorrera egokitzea, garraiobideak partikularrak zein publikoak zentzuz erabiliz.
Biodibertsitatea
Ekosistemak osatzen dituen biodibertsitateak funtsezko ondasun ugari ematen ditu bizitzarako, besteak beste, klimaren erregulazioa. Biodibertsitatea zaintzea tresna eraginkorra da klima-aldaketara egokitzeko eta harekiko erresilientzia garatzeko.
